مونگیر : (پریس ریلیز)
آئی آئی ٹی- جے ای ای اور نیٹ کی تیاری کے ساتھ رحمانی30 اب طلبہ کو حسابات، مالیات اور کمپنیوں کے انتظام سے متعلق پیشہ ورانہ شعبوں کے لیے بھی تیار کر رہا ہے۔ اس کے تحت چارٹرڈ اکاؤنٹنسی (سی اے)، کمپنی سیکریٹری شپ (سی ایس) اور کاسٹ اینڈ مینجمنٹ اکاؤنٹنسی (سی ایم اے) کی تیاری کرائی جا رہی ہے۔ انسٹی ٹیوٹ آف چارٹرڈ اکاؤنٹنٹس آف انڈیا (آئی سی اے آئی) کے ستمبر 2026 کے سی اے انٹرمیڈیٹ امتحان میں رحمانی30 کے طلبہ کی مجموعی کامیابی کی شرح 75 فیصد رہی۔
گروپ 1 میں کامیابی کی شرح 50 فیصد رہی، جبکہ قومی سطح پر یہ شرح 23.14 فیصد تھی۔ گروپ 2 میں طلبہ نے 80 فیصد کامیابی حاصل کی، جبکہ قومی شرح 18.92 فیصد رہی۔
مولانا محمد ولی رحمانیؒ کے قائم کردہ اس پروگرام کا تصور تیار کرنے میں ماہر تعلیم (سابق ڈی جی پی)جناب ابھیا نند جی بھی شامل تھے۔ اہلیت کی بنیاد پر منتخب طلبہ کو رہائشی ماحول میں منظم تعلیم اور اساتذہ کی مسلسل رہنمائی فراہم کی جاتی ہے۔ پروگرام نے مالیات، کمپنیوں سے متعلق قوانین اور نظم و نسق کے شعبوں تک اپنا دائرہ وسیع کیا ہے۔

کامرس پروگرام میں پیشہ ورانہ تیاری کے ساتھ کاروباری دیانت، شفاف مالی انتظام اور سماجی ذمہ داری پر توجہ دی جاتی ہے۔ یہ تعلیمی نقطۂ نظر تجارت اور مالی معاملات میں دیانت کی اسلامی روایت سے جڑا ہے۔
طلبہ، رہنمائی کرنے والے اساتذہ اور اہل خانہ کو مبارک باد دیتے ہوئ امیر شریعت حضرت مولانا احمد ولی فیصل رحمانی نے دوسرے پیشہ ورانہ شعبوں کے ساتھ کامرس اور قانون کو بھی کیریئر کے طور پر اختیار کرنے کی ترغیب دی۔ انہوں نے ٹیکنالوجی، طب، معاشیات، کمپنیوں کی پالیسیوں اور قانون کے شعبوں میں نوجوانوں کی شرکت اور دیانت و قابلیت کے ساتھ سماجی خدمت پر زور دیا۔
رحمانی30 کے 2029–2027 کے رہائشی تعلیمی بیچ میں داخلے کے لیے درخواستیں طلب کی جا رہی ہیں۔ خواہش مند طلبہ کے والدین اور سرپرست آن لائن درخواست جمع کروا کر داخلہ جاتی انتخابی عمل میں شرکت کے لیے اپنے بچوں کا اندراج کر سکتے ہیں۔

